黑鯊冰封制冷背夾 2 磁吸版開箱
開箱就都係一堆實物圖，不過畀大家睇圖之前，我直接同大家分享一下，我用主機 iPhone 11 Pro 試用後的感覺吧。我會分開優點同缺點來說：| 優點 | 缺點 |
| 1. 確實做到手機降溫效果，就算不用做甚麼測試 (我都無相關工具去測溫)，你親身摸落去已經 feel 到冰涼感覺。 2. 幾乎大部分手機，甚至平板都用到 (但凡事有例外，就好似三星 Z Flip3 摺機，你要摺埋就未必用到了)，因為只需用磁吸貼貼到手機上，然後將風扇貼下去即可，也算是方便拆卸。 3. 轉速 7200 轉 / 分鐘，風扇聲音不算大聲。 4. 價錢唔算貴，豐澤有賣 $359。 |
1. 依然大舊，拎出街用唔方便。 2. 磁吸力度比磁吸貼貼喺手機上嘅痴力仲要強，雖然話就話方便拆卸，但我一拆就連磁吸貼都拆走埋。這帶來的問題就是，成日又甩又痴，好容易會搞到無哂痴力。 3. 明明有磁吸貼可以另外買，但香港無得買，要買就要自己去大陸小米商城買，或者偉大嘅淘寶幫到你。 4. 本身無內置電池，一定要拉住條 USB 線先用到，唔方便。 5. 雖然幫到手機降溫，但風扇本身依然會有一定熱力，特別當風扇向下放，過一陣間拎上手會 feel 到有點熱，所以放低手機一定要將屏幕向下先得。 |
▲ 產品包裝盒如上圖，都係一睇就有陣小米味。
▲ 打開會見到風扇實機。
▲ 有條 USB C to USB C 充電線。
▲ 本身風扇支持 iPhone 12 系列的 MagSafe，不過為方便其他手機使用，跟機會送張磁吸貼。而如果你有多部裝置，你可以額外自行購買磁吸貼，但就香港無囉，要去大陸小米商城搵，或者偉大嘅淘寶幫到你。
▲ 我手上主機就用 iPhone 11 Pro，比較適合係裸機使用，首先將磁吸貼上面層膠摵走，然後你就可以將磁吸貼痴落去部手機度。
▲ 然後你就可以將風扇對準磁吸貼，輕力放落去，即可。
▲ 貼歪咗，無事嘅，諗住抆返個風扇出嚟，再重新貼過囉。點知磁吸力度大過磁吸貼痴住我部 iPhone 11 Pro 嘅痴力，變相就連成張磁吸貼都抆埋出嚟，呢樣真係意想不到。如果下下都係咁，真係好快張磁吸貼痴哂塵，然後最後就無哂痴力。
▲ 幾經辛苦，終於對返正喇，得咗。
▲ 不過都有唔好嘅地方，無內置電池，一定要叉住個風扇先可以用到，即係變相你出街打機，都要掛住個尿袋駁住風扇先得，呢個相信係一個唔方便嘅地方。
▲ 因為版主我自己又無監測溫度的工具，而 iPhone 上幾乎沒有 app 可以查看手機的溫度，於是乎我就找了一款電腦應用程式 iMazing，查看電池的溫度，可以見到在版主一直着住個芒而又有使用風扇的情況下，當前手機電池溫度為 23 度。
▲ 而關掉風扇後，繼續着住個芒，見到溫度開始逐漸升溫，大約 6 分鐘後，已經升到 28.1 度。而在手機一直靜止，單純着住個芒嘅情況下，電池溫度去到 30.5 度就開始停止。由此可見，在甚麼都不做的情況下，風扇可以大約幫到手機降溫大約 7.5 度。別小看這 7.5 度，這只是因為手機沒有在工作的情況下，如果打機嘅話，會見到更明顯嘅分別。
▲ 再來我開住風扇，用嚟玩咗一場 PUBG mobile 食雞，食完一場雞你預大約半個鐘左右，溫度都只係 27.1 度，可見佢散熱能力都相當強，呢樣都係幾意想不到，意料之外。
立即加入Facebook 專頁，新聞／消息／優惠，最快知。
開箱$359 黑鯊冰封制冷背夾2 磁吸版，發生咗意想不到嘅事!? - ePrice.HK
Read More
