呢個暑假，我哋喺樂施會實習，本身以為一直都只係做 office work，點知第二日就有得玩《西城計：看不見的存在》。職員姐姐同我哋講，呢個係樂施會自己創作嘅戶外實境解謎遊戲，俾玩家透過觀察同解謎，深刻體驗隱藏在社區中嘅貧窮實況。聽到嗰下，我哋都覺得好新穎，冇諗過 NGO 都可以咁有創意，而且「實境解謎」聽落去都好吸引呢!
第二日，我哋檢查好遊戲盒道具、download 咗遊戲 app 之後，就同另外兩位朋友喺西營盤地鐵站集合。《西城計》故事有五個遊戲角色，佢哋性格各異，關心嘅事物可以話係大相徑庭。一開始我哋要揀好各自想扮演嘅角色，全部確認後就可以開始遊戲啦!
《西城計》係「實境解謎」遊戲，玩法類似密室逃脫同 city hunt 嘅混合版。我哋要跟住遊戲 app 指示到達 checkpoint ，然後透過觀察四周景物，配合遊戲盒道具破解題目，先可以解鎖下一個地點。
身為遊戲菜鳥嘅我哋，齋揾 checkpoint 都花咗唔少時間，但期間都加深咗我哋對西環嘅了解。一直以嚟，我哋對西環嘅印象都圍繞住高級住宅區、打卡熱點。但玩過先知，原來西環嘅靚樓旁邊就挨住舊樓，沿途亦有唔少特色店鋪。
講番個遊戲劇情，我哋最深刻嘅角色係 Gini，佢全程都淨係想打卡，又以「女神」自稱，係一個名副其實嘅「港女」。路過垃圾站，或者見到執紙皮嘅婆婆，Gini 都會滿口嫌棄。本身我哋以爲佢只係貪靚、怕污糟，但慢慢睇到多啲由 Gini 提出針對貧窮人嘅批評，我哋意會到，當中存在唔少對窮人嘅迷思，甚至偏見。呢啲劇情令我哋有好多反思：喺日常生活，我哋係點看待弱勢社群? 貧窮背後又有咩原因，甚或係深層次嘅社會問題呢?
呢次《西城計》體驗之旅，有刺激解謎嘅時刻，亦都有輕鬆逗貓嘅時刻。我哋都估唔到半日時間過得休閒之餘，仲可以咁有意義！如果大家 weekend 唔知玩咩好，不妨試下《西城計》，嚟一次別具特色嘅香港深度遊。
兩個傳理系學生，暑假喺樂施會做實習生。關心弱勢，關心社會，關心天下事。
分享連結:
意想不到的西環解謎之旅| 可可與朱迪 - fitz.hk
Read More
Tidak ada komentar:
Posting Komentar