S888 太貴價？最平三千有找S870 旗艦有得揀？ - ePrice.HK

直到今時今日，身邊依然仲有朋友會問我，點解而家旗艦手機賣價又唔係低，但好似無以前咁多減價？其實呢個問題，我都講咗千百萬次，不過朋友仔唔熟呢個手機市場，又無可厚非。最主要就係，今年大部分旗艦都係用緊 S888 U，但本身呢粒 U 貨量又唔多，本來唔多貨又點會減畀你先，所以最後我都係推薦，如果你想平平地玩旗艦手機，不如退而求其次揀 S870 旗艦仲好啦！平起上嚟，三千蚊都唔使，分分鐘抵玩過你買八九千蚊一部 S888 旗艦。下文同大家睇下，到底有乜 S870 手機選擇。

 

vivo X60 / X60 Pro

呢部手機我以前都成日掛在口邊，算係一部今年我比較鍾意嘅手機，不過後來太多其他手機用，已經放低咗佢，主要係因為手感唔差，兼且系統仿原生，比較容易吸引到我去用佢。不過，如果我唔係因為做傳媒有機試，而係以一個消費者角度，我未必會揀佢，因為始終都係偏貴，X60 大舖賣價一直無減，都係賣緊 $4698，而 X60 Pro 大舖賣價則由 $5998 減至 $5698，減價三百。

而畀埋細舖價大家做參考，vivo X60 5G (8GB+128GB) 細舖行貨價為 $3660，水貨價約 $3280，而 X60 Pro 5G (12GB+256GB) 細舖行貨價則為 $5050，而水貨價則為 $4380。如果唔介意水貨，都叫做三千頭有交易，又有無少少吸引力呢？

vivo X60 在文章發表時，大舖賣價為 $4698，按這裡有詳細規格及最新賣價。
vivo X60 Pro 在文章發表時，大舖賣價為 $5698，按這裡有詳細規格及最新賣價。
 

小米 POCO F3

呢部 POCO F3 同樣係有出香港行貨，不過小米產品本身賣得平，減價幾乎無，6GB+128GB 企硬 $2799， 8GB+256GB 企硬 $3199，但依然都係比 vivo X60 / X60 Pro 細舖價抵玩。至於 POCO F3 細舖價又點呢？其實唔會相距唔會好似 vivo 咁大，兩個版本行貨都係大約平多 $100 - $200 左右囉。咁不如豐澤 / 官網買好過～

不過，如果想再平啲，都可以考慮大陸版嘅紅米 Redmi K40 5G，6GB+128GB 版本現時賣價為 $2280，8GB+128GB 為 $2580，8GB+256GB 則為 $2980，而 12GB+256GB 則為 $3150。

 

Moto Edge S 5G

呢部我哋之前比較少提，同樣係有 S870 處理器，有 6.7 吋芒，有前置雙鏡頭，而後置則有 64MP + 16MP + 2MP 三鏡再加 3D ToF 鏡頭，仲有 5000mAh 大電，應有嘅，佢都大致有，不過就得水貨，6GB+128GB 水貨賣價為 $2480，而 8GB+256GB 水貨賣價則為 $2680。價錢就同紅米 K40 5G 差唔多，但出自 Moto 手，又會唔會更有吸引力呢？

 

立即加入Facebook 專頁，新聞／消息／優惠，最快知。

Adblock test (Why?)

S888 太貴價？最平三千有找S870 旗艦有得揀？ - ePrice.HK
Read More